24 mai 1385 : des bouchers pour Saint-Alyre
TRANSCRIPTION
Jehan, filz de roy de France, duc de Berry et d’Auv[er]gne, conte de Poitou, lieuten[ant] de monseigneur le roy en noz diz pais, au senechal d’Auv[er]gne ou a son lieuten[ant],
salut. Les religieux, abbé et couvent de Saint-Alire lez Clermont nous ont exposé en eulx griefment complaignant que ja soit ce que ilz soient en saisine
et possession que plusieurs bouschiers ont accoustumé de vendre char et tenir boscherie dedens le circuité ou septe dudit lieu de Saint-Alire, neantmoins le
chapitre de Clermont ont fait deffendre indeuement par c[er]tain sergent royal auxdiz bouschie[rs] que ilz ne vendent plus char ne tiegnent boscherie au
dit lieu et aux diz religieux que ilz n’en usent avec plus[ieur]s aut[re]s deffenses, sur les quelles chos[es] lesdiz religieux d’une part et ledit chapitre d’autre
sont en cause [et] proces par devant vous. Si nous ont fait supplier lesdiz religieux que com[m]e sans cause raisonnable la d[ic]te deffense leur ait esté
f[ai]te et dure chose leur seroit [et] contre raison qu’ilz fussient despoillez [et] dessaisif de leur possess[ion] pendant le plait qui pourroit longuement durer
et consideré que en ceste partie se traitte de franchise [et] liberté qui est chose favorable, nous leur vuillens sur ce pourveoir de remede convenable,
pour quoy nous inclinans a leur supplicac[i]on en ceste partie avons ottroié et ottroions de grace especial se mestier est p[ar] ces p[rese]ntes aux diz
suppl[ians] que les diz bosch[ie]rs puissent vendre char [et] tenir boscherie audit lieu tout en la forme et manie[re] qu’ilz li avoient accoustumé de tenir
avant la deffense dess[us]d[ic]te jusques a ce q[ue] les p[ar]t[ies] oyes par nous, les gens de n[ost]re conseil ou vous soit autrem[en]t ordonné sur ce, si vous man-
-dons [et] com[m]andons que de n[ost]re p[rese]nte grace [et] octroy vous faites les diz religieux et bouschiers joir et user paisiblement, et contre la teneur
d'icelle ne les empeschiez ou souffrez empesch[e]r en aucu[n]e manie[re], appellacions frivoles [et] l[ett]res subreptices a ce contraires non obstant q[ue]lcon-
-ques. Donné à Yssoire le XXIIIe jour de may l’an de grace mil CCC quatre vins et cinq.
Par mons[sieur] le duc [et] lieuten[ant] a la
rel[ation] du conseil
Bordes
24 mai 1385 : des bouchers pour Saint-Alyre
Arch. dép. Puy-de-Dôme, 1 HPS 257