Consultez le document  3 GPS 1050 2 avec la visionneuse

TRANSCRIPTION

A tous ceulx qui ces presentes lectres verrons et orront, Pierre Montoloys, serviteur du roi nos[tre sir]e, juge et garde de la prevosté des exemptions d’Auvergne, de par led. seigneur, salut. Savoir faisons que le jour date des p[rese]ntes

dans l’eglise cathedrale N[ost]re-Dame de Grace de la cité et ville de Clermont et au lieu capitulaire de ladicte eglise ont esté presens par devant nous en leurs personnes venerables personnes maistres Guillaume de Benault et Jehan Vaillent, p[rest]res, chanoines et bailes d’icelle

eglise, lesquelz par la voix et organe dudit maistre Jehan Vaillent et pour et ou nom du venerable chappitre de lad. eglise, nous ont dit et exposé que lad. egl[is]e cathedrale N[ost]re-Dame de Grace est une belle et notable eglise de grande estandue et fondacion royal

anciennement bastie et edifiee, et la principale eglise du diocese et evesché dud. Clermont, ausquelz ne y a point d’autre eglise cathedrale, ains est le chief de toutes les autres eglises desd. diocese et evesché, en laquelle eglise cathedrale de Clermont y a

l’evesque et plusi[eu]rs autres dignitez comme prevost, abbé, chantre, doyen et plusieurs chanoines et autres habituez et officiers [ ???] icelle eglise si fait et continué ung chacun jour le divin service bel et solempnel et bien renommé de tous, et car lad. eglise est

de grant estandue et anciennement bastie et edifiee comme dit est imperfaicte et non p[ar]achevee de bastir et edifier en plusieurs parties d’icelles sont faicte veoir et visiter a plain et de tous coustez par les principaulx maistres maçons et ouvriers dud. Clermont

et d’ailleurs, expers en tel cas, c’est assavoir par Pierre Montholoys, Guillaume Guthon, Bertrand Constant et Pierre du Molin maistres maçons et habitans, c’est assavoir lesd. Pierre Montoloys et Bertrand Constant de lad. cité et ville de Clermont, led. Guillaume Guthoux

Domezat et led. Pierre du Molin de Touraine, et pour de ce faire apparoir ont produit par devans nous lesd. Pierre Montelons, Guill[aume] Guthoux et Bertrand Constant disans led. Pierre du Molin estre absent dudit Clermont, nous requerant iceulx a ceste

fin et sur les choses dessud. estre par nous interrogez et examinez par maniere d’actestation pour audit chappitre et eglise cathedrale de Clermont faire et valoir en temps et lieu et ou il appartiendra ce que de raison. Oy laquelle requeste,

obtemperans a icelle iceulx Pierre Motoloys eagé de soixante dix, Guillaume Guthoux de cinquante et Bertrand Constant de quarante ans ou entour presens par devant nous avons sur les choses dessud. Par manière d’actestacion interrogez et

examinez, lesquelz et ch[ac]un d’eulx par leur serement sur ce fait ont dit actisté et par verité affermé que ilz ensemble ledit Pierre du Molin ont ladicte eglise cathedrale de Clermont bien et deuement veue et visitee par dedans, par dehors

et de tous les constez d’icelle pour veoir et savoir au mieulx que possible leur a est les reparacions et edifications convenables et a icelle necessaires, et que pour a icelles reparacions et edificacions qui sont necessaires a lad. eglise fournir

et faire faire au plus pres de leur adviz et selon leurs consciences fauldra fournir et consteront bien les sommes contenues en leur rapport sur ce fait qu’ilz ont fait, rédiger et mecter par escript par Clement Brognard, notaire royal tel que

signé comme ilz ont affermé de la main et seing manuel dud. Guill[aum]e Guilhoux et aussi escript et signé de la main et seing manuel dud. notaire par le commandement desd. Pierre Montoloys et Bertarnd Constant car ne savent signer, absens comme

dit est led. Pierre du Molin, lequel rapport ilz ont mis et produit par devans nous conten[u] ce qui s’ensuit. Les reparacions et edificacions convenables et neccessaires faire et perfaire a l’eglise cathedrale de Clermont en Auvergne sont

cy ampres par articles defigurés : premierement est neccessaire perfaire le portal de ladicte eglise qui est du cousté de midi de la grant croisee d’icelle egli[s]e, lequel portal est imperfaict, et fault pour iceluy perfaire deux cens

livres tourn[ois] ; item convient reparer et perfaire les deux tours ou clouchiers qui sont joignans audit portal de deux coustez, pour ce faire fault fournir en deniers troys mil cent livres tourn[ois] ; plus convient reparer et p[er]faire

une tour ou clouchier qui est joignant au portal de lad. eglise appellé le portal N[ost]re Dame de Graces qui est devers bize, a laquelle tour est le relevé posé ou convient pour ce faire deux mil livres tourn[ois] ; item est neccessaire faire en lad.

eglise troys grans croisees, pour accomplir et perachever la longueur qui appartient en icelle eglise du cousté de nuyt ensemble troys chapelles d’un cousté et d’autre les basses nefz et arcs boutans par-dessus y afferans

neccessaires en ensuivans la façon et construction de lad. egli[s]e, par quoy fault trente six mil livres tourn[ois] ; item et au bout desd. croisees convient faire troys portaulx, ung grant et deux petiz, ensemble deux grosses tours en

façon de clouchiers, par quoy fault cinquante cinq mil livres troun[ois] ; item et pour obvier a grant yssoir [ ?] et couvement [ ?] convient et est bien neccessaire ruer sus et abbatre deux tours qui sont fort caducques et brisees ou son posees les grans cloches

de lad. eglise, pour quoy tant pour l’abbatre que ester le merrant mil livres tourn[ois] ; item convient reffaire la couverture de lad. egli[s]e de boys neuf et actendu et au regard a l’edification et dignité d’icelle eglise appartient et est neccessaire

la couvrir de plomb ou d’ardoise, et pour ce faire fault troys mil livres tourn[ois]. Lesquelles edificacions et reparacions dessusd. ont esté veues, visitees et considerees par maistres Pierre Montoloys, Guillaume Guihoux, Bertrand Constant et P[ier]re

du Molin maistres maçons et gens expers en tel cas, lesquelles sont bien convenables et neccessaires faire a lad. eglise pour le prouffit, utilité et augmentacion d’icelle, ou autrement pourra venir et choir lad. eglise a l’occasion de ce en grant ruyne

et demolucion inestimable, et pour icelles faire convient a tout le moins cent mil et troys cens livres tourn[ois], ainsi signé et escript dessoubz une marge Guilhoux Regnard pour le comandemens desd. maistres P[ier]re Montoloys et Bertrand

Constans sus nommez, desquelles choses dess[us]d. lesd. maistres Guillaume de Bournel et Jehan Vaillent aud. nom que dessus nous ont requis cesd. p[rese]ntes leurs estre par maniere d’actestacion faictes pour leur servir et valoir comme

dessus est dit que leur avons octroyees. En tesmoing de ce cesd. p[rese]ntes avons signees ne n[ost]re seing manuel et scellees de n[ost]re seel, et icelles pour plus grant fermeté faictes signer a maistre Pierre Richier, notaire royal à ce p[rese]nt et par nous

appellé, es presences dud. Clemens Broquard, notaire susd., qui a dit et affermi avoir escript et signé comme dessus dit est led. rapport dessus inscrit, messires Girault Debort Noé Lymoges chanoines et Pierre Marchadier chorier et habitué

de lad. egli[s]e appellez par tesmoings le dixhuitiesme jour de novembre l’an mil quatre cens quatre vingtz et seize

Devis et estimation de la dépense qu’il conviendrait de faire pour finir entièrement le bâtiment de l’église cathédrale de Clermont (18 novembre 1496) 

Arch. dép. Puy-de-Dôme, 3 GPS 1050 2