3 janvier 1581 : Testament jean Vernet
Personnellement estably vennerable personne
Messire Jehan Vernet p(res)b(t)re de l’esglize Monsieur
S(aint) Jehan d’Ambert, lequel de son gré (et) voulanté
estant a sa maison saing de coprs et pansée (et) antandement
a dict avoir consideré (et) considere q(ue) a toute
creature humaine venant fault finir (et) terminer
par trespas l’heure duquel est incertaine
ne voulant decedder intesté, a mandé en sad.
maison le nocth(aire) royal soubz signé pour luy
radiger p(ar) escript sond. testement lequel
il a faict (et) dict de sa propre bouche (com)me
s’ensuyt : P(re)mier le signe da l acroix sur sa
personne Je Jehan Vernet p(re)b(st)re de l’esglize
parrochielle Monsieur s(ainc)t Jehan d’Ambert faictz
mon testement (et) ordonnan(ce) de derniere voulanté
par lequel je recomande mon ame a Dieu
le createur icell(uy) supplye luy fere pardon (et)
misericorde (et) icelle departie la mectre
au roiaulme de Paradis et a la glorieuze
Vierge Marye, sainctz et sainctes de Paradis
interceder pour icelle mon ame despartie (et)
separee de mond. Corps veulx icell(uy) corps estre
inhumé (et) ensepulturé es tombeaux (et) vazes de
messieurs de la (com)munaluté de lad. eglize d’Ambert
[p. 1 r°]
veulx q(ue) le psaultier soict dict le jour de mond. decedz (et) encores
dict ung aul(tre) foys le lendemain de mond. decedz
le matin avant q(ue) feront ma sepulture ch(ac)un p(ar) quatre
p(re)b(st)res (et) a ch(ac)un veulx estre donné II s. II d. mond. corps
sortant de ma maison veulx estre dict Salve Regina
(et) a l’eglize Stabat (et) troys messes a haulte voix
a diacre (et) soubz diacres Exaudi (et) aultres versetz
(et) suffrages acoustumés par lesquelles donne la
som(m)e de XL s (et) a ch(ac)un p(re)b(st)re q(ui) adcistera XX d.
ma lumiere estre faicte de six livres cire. Veulx
q(ue) tous lesd. p(re)b(st)res (et) serviteurs de lad. esglize
tous mes parans amys (et) voisins estre invités (et)
(et) appellés a ma sepulture (et) leur estre donné
a disner ; veulx estre donné a treize pouvres
q(ui) accompageront mond. corps pourtant ung cierge a la main a ch(ac)un ung aulne
(et) ung quart de drapt burre et estre aulmosné
es pouvres troys sestier seigle mesure d’Ambert
q(ui) seront convertes en pain aussi estre dict une
quarantaine de messes a basse voix devant quarante
jours apres mond. deudz (et) a ch(ac)un jour estre faict
offrande d’ung pain blanc appelé michon, une choppine
vin (et) une chandelle (et) XX d., aussi ch(ac)un dimanche
durant l’annee de mond. trespas estre faict offerande
a la grand messe de pain (et) vin a la fin
ou bout de l’an de mond. decedz veulx estre faict chanter ung
[p. 2 r°]
General (et) est(re) dict troys meses a haulte voix
a diacres (et) p(our) icelles estre bayé XL s. (et) a ch(ac)un p(re)b(st)re
XX d. donné aux bonnes ames ou troncq
d’icelles, la meilheur de mes robes a l’hostel Dieu de
ceste ville dix solz, a la luminaire ou fabrique de l’esglize dix solz t., a la maladerie dix solz, a monsieur
l’evesque de Clermont pour tout le droict (com)me pourroit
avoir (et) p(re)tandre sur mes biens cinq solz
Donne et legue p(ar) forme de donnats ou leguat
testamentere en la forme pourtee p(ar) la (cou)stume
generalle d’Auvergne a Anna Vernet ma
niepce filhe a feu Mathieu en preciput (et) avantage
de mes aultres heretiers ung quart ou
quarte p(ar)tie de tous (et) ch(ac)un mes biens meubles
immeubles noms debtes droictz (et) actions quelzconques
q(ue) je me trouveray saysy lors de mond. decedz duquel
je la constitue vray dame (et) maistresse po(ur) en fere
(et) agir (com)me ch(ac)un de sa choses, et pour executeur
du p(rese)nt mon testem(en)t nom(m)e (et) institue venn(era)ble p(er)sonne
messire Jaques Columbier p(re)b(st)re dud. Ambert ensamble
le sindic (et) procur(eu)r de la (com)munaulté desd. p(re)b(st)res q(ui) s(er)a
auxsquelz je donne plain pouvoir (et) puissance d’icelle fere executer
sellon sa forme (et) teneur prandre (et) saisir de mes
biens de leur plaine auct(orit)é sans actandre la
voye (et) forme de la justice pour l’exec(ution) (et) entretenement
d’icell(uy) et par ce q(ue) tout chef (et) fondement de
testament est institu(ti)on d’heritier, a ceste cause
je nom(m)e (et) institue mes heritiers en mes au(ltre)z biens
non donnés cy dessus (et) a la charge d’antretenir
le p(rese)nt mon testement lad. Anna Vernet mad.
Niepce (et) Anth(oin)e, Jehanne (et) Guabrielle Vernetz
Mes nepveu (et) niepces enfans a feu Mathieu mon fre(re)
[p. 2 r°]
ch(ac)un p(ar) esqualles pourtions, et a vous Georges Gladel
nothaire (et) personne publicques du present mon
testament en demander instrument publicq
pour y avoir recourdz si besoing est. Lequel
instrument a est p(ar) moyd. noth(aire) a esté aud.
Vernet testateur le requerant ces p(rese)ntes ensamble
de ce q(ue) pour entretenement de tout le (con)tenu en
icell(uy) il a obligé (et) ypp(othe)qué tous (et) ch(ac)uns ses biens
p(rese)ns (et) advenir. Faict en lad. ville d’Ambert maison
dud. testateur es p(rese)nces de honnorables Me
Niolas Aurens praticien habitant d’Ambert (et)
Jehan Julhard filz a P(ier)re habitant d’Ambert qui
ont signé (com)me sa led. testateur le IIIe jour
de janvier M VC quatre vingtz (et) ung apres
midy
Testament jean Vernet (3 janvier 1581).
Arch. dép. Puy-de-Dôme, E-dépôt 5 E 18/345