14 septembre 1344 : Les prêcheurs de Clermont et la régale
Ph[ilippe] par la grace de Dieu roys de France. Savoir faisons a touz presenz et avenir que com[m]e feu Guy
de la Tour, jadis evesque de Clermont, eust faiz plus[ieurs] aquez ou temps qu’il estoit evesque dudit lieu, desquels acquez p[ar] li faiz
il donna et lessa en son testament ou derraine voulenté au prieur et convent de l’ordre des freres prescheurs de Clermont
pour le nombre des freres dudit ordre accroistre ou convent dudit lieu et pour le vivre et sustentat[i]on des diz freres quat[r]e
vinz et quinze sestiers de forment de rente annuelle et p[er]petuelle a prendre chascun an sus lesdiz acquez si com[m]e il dient estre
plus plainement contenu ou dit testament, de la quelle som[m]e de blé les diz p[ri]eur et convent par vertu du don a eulz fait
par le dit evesque ont esté depuis le dit don en ça en poss[essi]on et saisine de prendre, avoir et percevoir chascun an ou temps
passé tant par la main des evesques qui ont esté pour le temps com[m]e par la main de l’evesque qui est a present les quat[r]e
vinz et dix sestiers de froment de rente dess[us] diz par an touzjours, continuelment, senz int[er]upc[i]on jusques a present, co[m]bien
que ou temps des regales qui ont esté tant en n[ost]re temps com[m]e ou temps de nos predecess[eurs] roys de Fra[n]ce l’en ait rayé leur
d[i]c[t]e rente es comptes des regaleurs qui ont esté pour le temps [et] ne les ont voulu passer ne descompter es comptes des
diz regaleurs nos genz des comptes a Paris pour ce que l’en ne les trouvoit pas es comptes precedens rendus a court
des d[i]c[t]tes regales et pour ce aussi que le dit evesque testateur ne povoit lier ne obligier le droit de nous ne de noz pre-
-decesseurs senz la voulenté et aut[ori]té d’eulz [et] et de nous. Pour quoy nous ont supplié les diz p[ri]eur et convent de po[ur]veoir a eulz
sus ce de remede convenable, et pour ce que nous avons devocion au s[er]vise divin accroistre et affect[i]on esp[eci]al au dit ordre,
nous, pour le salu de n[ost]re ame et de n[ost]re tres ch[er]e compaigne la royne et de noz enfanz, de grace esp[eci]al et de certaine science
le dit don et lays fait par le dit feu evesque loons, agreons, ratiffions et approvons, et de n[ost]re aut[ori]té royal conf[ir]mons
a touzjourzmaiz et voulons et mandons que doresenavant, touteffoiz et quanteffoiz que le dit regale escharra et
venra en n[ost]re main ou de noz success[eurs] roys de France, la rente dessus d[i]c[t]e soit paiée au diz prieur et convent senz diffi-
-culté pour le temps et selon la afferne ( ?) que le dit regale aura esté en n[ost]re main et de noz success[eurs] roys par les com[m]issair[es]
qui s[er]ont deputez a recevoir le dit regale, et à noz amez et feaulz genz de noz comptes a Par[is] que tout ce qui paié leur
aura esté de leur d[i]c[t]e rente par les diz com[m]issair[es] ils alloent en leurs comptes et rabatent de leur recepte, non contresta[n]t
quelconques orden[ances] ou mandemenz contraires a ce. Et que ce soit ferme et estable a touzjourzmais, nous avons fait
mettre n[ost]re seel a ces l[ett]res, sauve n[ost]re droit en aut[re]s chos[es] et en toutes l’autrui. Donné a Saint-G[er]main en Laye le XIIIIe
jour de septembre, l’an de grace mil troys cenz quarante [et] quatre.
Les prêcheurs de Clermont et la régale (14 septembre 1344)
Arch. dép. Puy-de-Dôme, 27 H PS 13